«Ордабасы» футбол орталығының директоры Когай Сергей Владимирович өткен маусымның нәтижелері және келер жылдағы басты мақсаттар туралы баспасөз қызметіне сұхбат берді.
2024 жылы Саво Ковачевич бас бапкер ретінде біздің футбол орталығымызға келіп қосылды. Онымен бірге 2027 жылға дейінгі даму стратегиясының жоспары әзірленді. Бұл жұмыс өз жемісін берді: екі жастар командаларымыз чемпион атанды - «Ордабасы-2009» және «Ордабасы -2008–2009» қыздар командасы. Сондай-ақ, QJ League турнирінде екі командамыз жақсы өнер көрсетті: «Ордабасы U18» командасы екінші орынды иеленсе, U17 командасы қола жүлдені жеңіп алды.
Инфрақұрылымды жаңғыртуға өлшеусіз көмек көрсеткен «Ордабасы» футбол клубының басшылығына ерекше алғысымды білдіремін. Кабинеттер күрделі жөндеуден өтіп, қажетті құрал-жабдықтар – ноутбуктер, принтерлер сатып алынды, бұл біздің футбол орталығымызға өз жұмысын тиімді жүргізуге мүмкіндік берді.
Дегенмен, менің ойымша, орталықтың ең үлкен жеңісі - Жасұлан Әмір, Тимур Рахимов және Бағдәулет Нұралы бас командамен келісімшартқа отыруы болды. Бұл үш талантты футболшы орталықтың әр жас балаларына үлгі. Бұл біздің дұрыс бағытта келе жатқанымызды растайтын маңызды қадам.
Қазіргі уақытта бізде өткен жылмен салыстырғанда түбегейлі өзгерістер жоқ, өйткені өткен маусымда жұмыс жоғары деңгейде жүргізілді. Енді біз үшін осы бағыттағы жұмысымызды жалғастыру маңызды. Біздің үш командамыз QJ лигасына (2008, 2009, 2010) қатысуға дайындалуда, сонымен қатар біз 2009-2010 жылдарға арналған қыздар құрамасы туралы шешімді күтіп отырмыз. Мүмкін олар QJ League-да өз шеберліктерін көрсетуге мүмкіндіктерін алады. Балалар футболындағы басты мақсаттардың бірі – Жастар Чемпиондар лигасына жолдама алу. Біз алматылық «Қайратқа» бәсекелес болу үшін барымызды саламыз. Әрбір команда үшін мақсат өзгеріссіз қалады – жеңімпаздар қатарында болу.
Алдағы жоспарлар туралы айтар болсақ, біздің төрт команда жыл сайын өтетін турнирлерге дайындалуда: «Арман», «Жастар», «Дарын» және «Жалын». Сондай-ақ «Ордабасы-2008» командасы QJ League турнирінің алдында Сербияда оқу-жаттығу жиынын өткізеді деп жоспарлануда. Біз «Црвена Звезда» футбол клубымен ынтымақтастық меморандумға қол қоюды көздеп отырмыз, ал біздің жас футболшылар Хорватия мен Сербияда өтетін турнирлерге қатысады.
Қорытындылай келе, бізді үлкен мақсаттарға толы қызықты маусым күтіп тұр. Ең бастысы, жас футболшыларымыз жоғары нәтиже көрсетуі үшін барлығын жасадық. Біздің басты мақсатымыз – олардың дамуына көмектесіп, соңында негізгі құрамға дейін жеткізу.
