«Ордабасы U14» командасының бапкері Рысбеков Бақдәулет Исаұлы Мәскеуде өткен «UTLC 2025» Халықаралық турнирі туралы клубымыздың баспасөз қызметіне берген сұхбаты:
Ең алдымен, мен қала мен клуб басшылығына осындай үлкен мүмкіндік бергені үшін алғысымды білдіргім келеді. Бұл турнир шынымен де өте беделді әрі әлемнің ең үздік академиялары қатысатын жарыс. Бізге осы деңгейдегі турнирге қатысуға мүмкіндік берілгені үшін өте қуаныштымыз.
Бұл турнир бұрындары Алексей Батраков сияқты жас таланттарды ашып, оны Ресейдің ең үздік ойыншыларының біріне айналдырған алаң болды. Бір кездері Алексей осында өзінің жұлдызды жолын бастаған, ал бүгін ол Ресейдің ең үздік футболшыларының бірі. Бұл турнир, шынымен де, болашақ жұлдыздарды ашатын алаң.
Топтық кезеңде біз өте мықты екі командадан ұтылдық, олар кейін жеңімпаз бен күміс жүлдегер атанды. Бірақ осыдан біз тек жеңіліс емес, үлкен тәжірибе жинадық. Жігіттеріміз осында өздерін шынайы түрде сынап, әлемнің үздік командаларымен бәсекеге түсті.
Шымкент пен Қазақстанды осындай халықаралық деңгейдегі аренада таныту — біз үшін үлкен абырой әрі жауапкершілік. Бұл тәжірибе біздің футболшыларымыз үшін тек кәсіби тұрғыда емес, рухани тұрғыда да өте маңызды болды. Біз осы турнирден көптеген жаңа мүмкіндіктер мен тәжірибе алдық, және алдағы уақытта да осындай беделді жарыстарда өзімізді көрсетуге дайын боламыз.
